जळगाव :- राज्य परिवहन महामंडळाच्या वर्धापन दिनाचे औचित्य साधून आज (ता.१)जलसंपदा मंत्री गिरीश महाजन यांनी बस प्रवास केला. ना.महाजन यांनी जळगाव ते जामनेर असा बसने प्रवास केला. या वेळी त्यांनी बस चालक व वाहक यांचा पुष्पगुच्छ देऊन सत्कारही केला. प्रवासादरम्यान त्यांनी प्रवाशांनी गप्पादेखील मारल्या.
आज एसटीचा ७१ वा वर्धापन दिवस आहे. यानिमित्त आज सकाळी जळगाव आगारात प्रवाशांचे पुष्पगुच्छ आणि पेढा भरवून स्वागत करण्यात आले.त्यांच्यासोबत जळगाव मनपाचे भाजपचे गटनेते भगत बालानी, नगरसेविका उज्ज्वला बेंडाळे, नगरसेवक सुनील खडके, अरविंद देशमुख, अंगरक्षक आदी उपस्थित होते. वर्धापन दिनानिमित्त रांगोळी व फुलांच्या माळांनी स्थानकाला सजविण्यात आले.
दरम्यान, जळगावसह जिल्हाभरातील विविध आगारातील एकूण ७७ कर्मचारी ३१ मे रोजी परिवहन महामंडळाच्या सेवेतून निवृत्त झाले. या कर्मचाऱ्यांचा आगार प्रशासनातर्फे सपत्नीक सत्कार करण्यात येऊन त्यांची आगार परिसरातून एस.टी.तून वाजत-गाजत मिरवणूक काढण्यात आली.
