लखनऊ : उन्नाव बलात्कार प्रकरणात दोषी असलेला भाजपचा माजी आमदार कुलदीप सिंग सेंगरसह सात दोषींना १० वर्षांच्या कारावासाची शिक्षा सुनावण्यात आली आहे. यामध्ये दोन पोलीस अधिकाऱ्यांचाही समावेश आहे.उन्नाव बलात्कार पीडितेच्या वडिलांच्या हत्येप्रकरणी न्यायालयाने ही शिक्षा सुनावली.
यावेळी न्यायालयाने त्याला १० लाखांचा दंडही ठोठावला आहे. दंडाची रक्कम पीडितेला देण्यात येईल, असेही कोर्टाने य़ावेळी सांगितले आहे. या प्रकरणात उत्तर प्रदेशातील दोन पोलीस अधिकाऱ्यांनाही शिक्षा सुनावण्यात आली आहेत. एक त्यावेळी माखी पोलीस ठाण्याचे एसएचओ होते, तर दुसरे त्यावेळी माखी पोलीस ठाण्याचे उपनिरीक्षक होते.
२०१७ मध्ये उन्नाव येथील अल्पवयीन मुलीवर बलात्कार केल्याप्रकरणी गेल्या वर्षी न्यायालयाने माजी आमदार कुलदीप सिंग सेंगरला दोषी ठरवलं होतं. बलात्कारप्रकरणी न्यायालयाने त्याला आधीच शिक्षा सुनावली असून सध्या तो जेलमध्ये आहे. गेल्या आठवडय़ात या प्रकरणाचा निकाल दिल्ली न्यायालयाने राखून ठेवला होता.
