मुंबई : उपमुख्यमंत्री अजित पवार यांनी आज विधानसभेत चांगलीच टोलेबाजी केली. ज्योतिरादित्य शिंदे यांनी काँग्रेसला रामराम ठोकत भाजपमध्ये प्रवेश केला. यानंतर राज्यातही कोणी ना कोणी ज्योतिरादित्य शिंदे निर्माण होईलच असं सांगत काँग्रेस- राष्ट्रवादीला सावधानतेचा इशारा देणाऱ्या भाजपाचे ज्येष्ठ नेते सुधीर मुनगंटीवार यांना अजित पवार यांनी उत्तर दिलं. सुधीर मुनगंटीवार म्हणतात चूक झाली, चूक झाली. पण आता चुकीला माफी नाही, असं अजितदादा म्हणाल्यानंतर सभागृहात एकच हशा पिकला. इकडे ज्योतिरादित्य शिंदे होणार नाही, पण तिकडे (भाजप) होणार नाही याची काळजी घ्या, असा उपरोधिक सल्लाही अजितदादांनी मुनगंटीवारांना दिला आहे. त्यानंतर लागलीच मुनगंटीवारांनी अजित पवारांवर कुरघोडी करण्याचा प्रयत्न केला.
“शिवसेनेला फसवलंय, पण सेना एवढी संमोहित झालीय की, त्यांना दिसत नाही. आम्ही चुकलोय, पण त्याचा एवढा फायदा घेऊ नका. तुमच्याकडेही ज्योतिरादित्य शिंदे होईल,” असं सुधीर मुनगंटीवार म्हणाले.
यावर अजित पवार यांनी मुनगंटीवार यांना चित्रपटाचा डायलॉग म्हणत उत्तर दिलं. अजित पवार म्हणाले की, “सुधीर मुनगुंटीवार म्हणतात चूक झाली, चूक झाली. पण आता चुकीला माफी नाही.” हे वक्तव्य करताना अजित पवार यांनी बाजूला बसलेल्या मुख्यमंत्री उद्धव ठाकरे यांच्याकडे कटाक्ष टाकला. त्यावर उद्धव ठाकरे यांनीही मानेने नकार देत चुकीला माफी नसल्याचं सूचित केलं. तसंच “आपलं सरकार होणार आहे, होणार आहे, असंच तुम्हाला पाच वर्ष म्हणावं लागेल. इकडे ज्योतिरादित्य शिंदे होणार नाही, पण तिकडे (भाजप) होणार नाही याची काळजी घ्या.
