अहमदाबादमध्ये आजपासून 57 तासांचा कर्फ्यू

अहमदाबाद : देशाची राजधानी दिल्लीत कोरोनाचा कहर पुन्हा सुरू झाला आहे. दिल्लीनंतर गुजरातमधील अहमदाबादमध्येही कोरोना बाधित रुग्णाची संख्या मोठ्या प्रमाणत आढळून येत आहे.  या पार्श्वभूमीवर कोरोनाला वेळीच आळा घालण्यासाठी म्हणून गुजरात सरकारने पुन्हा लॉकडाऊन करण्याचा निर्णय घेतला आहे. 20 नोव्हेंबर ते 23 नोव्हेंबरपर्यंत हा कर्फ्यू असणार आहे. या दरम्यान दूध आणि औषधांची दुकाने सुरु ठेवण्याची परवानगी असणार आहे. यासोबतच राज्य सरकारने शाळा-कॉलेजेस 23 नोव्हेंबर पासून उघडण्याचा निर्णय देखील मागे घेतला आहे.

गुजरातच्या अहमदाबाद शहरात कोरोना व्हायरसच्या संक्रमणास रोखण्यासाठी शुक्रवारपासून 57 तासांचा कर्फ्यू लावण्याचा निर्णय घेतला आहे. अधिकाऱ्यांनी म्हटलं की अहमदाबाद शहरात शुक्रवारी रात्री नऊ वाजल्यापासून कर्फ्यू सुरु होईल. हा कर्फ्यू सोमवारी सकाळी सहा वाजेपर्यंत राहिल. अतिरिक्त मुख्य सचिव राजीव कुमार गुप्ता यांनी म्हटलंय की, ‘संपूर्ण कर्फ्यू’च्या दरम्यान फक्त दूध आणि औषधांची दुकाने सुरु राहतील.