अमेरिकेच्या दबावापुढे भारत झुकणार नाही -व्लादिमीर पुतीन
मॉस्को,वृत्तसंस्था रशियाचे राष्ट्रपती व्लादिमीर पुतीन यांनी अमेरिकेच्या दबावाला तोंड देणाऱ्या भारताची उघड बाजू घेतली असून, “भारत हा अमेरिकेच्या दबावापुढे झुकणारा देश नाही,” असे स्पष्टपणे सांगितले. काळ्या समुद्र किनारी सोची येथील वल्दाई चर्चा मंचात बोलताना पुतीन यांनी अमेरिकेवर निशाणा साधला. भारताने रशियन तेलाची आयात बंद केली तर त्यांना ९ ते १० अब्ज डॉलर्सचे नुकसान होईल, असे सांगून त्यांनी भारताच्या निर्णयाकडे बारकाईने लक्ष ठेवले जात असल्याचे नमूद केले. तसेच, भारतासोबतचा व्यापारी असमतोल कमी करण्यासाठी प्रशासनाला लेखी सूचना दिल्या आहेत.
भारताच्या सार्वभौमत्वाचे समर्थन
पुतीन यांनी पंतप्रधान नरेंद्र मोदी यांच्याबद्दल कौतुक करत सांगितले की, “मी मोदींना चांगले ओळखतो. ते कधीच भारताच्या सार्वभौमत्वाविरुद्ध निर्णय घेणार नाहीत. भारतीय लोक कधीच अपमान सहन करणार नाहीत.” अमेरिकेच्या दुप्पट तत्त्वावर टीका करताना ते म्हणाले की, अमेरिका भारतासारख्या देशांना रशियन तेलावर दबाव टाकत असली तरी स्वतः रशियाकडून युरेनियम आयात करत आहे. “अमेरिका ही न्यूक्लिअर पॉवर प्लांट्ससाठी रशियावर अवलंबून आहे,” असे त्यांनी नमूद केले.
रशियाच्या तेल पुरवठ्यावर अवलंबून असलेल्या जागतिक अर्थव्यवस्थेला नुकसान होऊ शकते, असा इशारा देत पुतीन यांनी सांगितले की, “जर आम्ही तेल पुरवठा बंद केला तर प्रती बॅरल तेलाची किंमत १०० डॉलर्सपेक्षा जास्त वाढेल.” अमेरिकेने भागीदार देशांवर टॅरिफ (कर) लादले तर ऊर्जा किंमती वाढतील, व्याजदर जास्त राहतील आणि अमेरिकी अर्थव्यवस्थेत मंदी येईल, अशी शक्यता त्यांनी वर्तवली. भारत-रशिया संबंधांना “विशेष” संबोधून ते म्हणाले, “आम्हाला भारतासोबत कधीच समस्या झाल्या नाहीत.”
भारताकडून रशियन कच्च्या तेलाची मोठ्या प्रमाणात आयात होत असल्याने व्यापारी असमतोल वाढला आहे. यावर उपाय म्हणून रशियन प्रशासनाला भारताकडून अधिक कृषी उत्पादने आणि औषधे खरेदी करण्याचे निर्देश पुतीन यांनी दिले. डिसेंबरच्या सुरुवातीला होणाऱ्या वार्षिक शिखर परिषदेसाठी पुतीन यांचा भारत दौरा निश्चित असून, त्यासाठी ते उत्सुक असल्याचे सांगितले. या दौऱ्यापूर्वीच हा निर्णय घेण्यात आला आहे.
या विधानांमुळे भारत-रशिया संबंध अधिक दृढ होण्याची अपेक्षा आहे, तर अमेरिकेच्या दबावाखालील व्यापारिक युद्धाला नवे वळण मिळेल.
